రివ్యూ: మోహ‌న్‌లాల్‌ “మన్యం పులి”

క‌థ‌:
పులియూర్ మ‌న్యం ప్రాంతం. అక్కడ పులులు సంచ‌రిస్తుంటాయి. ఓ పులి భారిన ప‌డి వాటి కార‌ణంగా కుమార్ (మోహ‌న్‌లాల్‌) తండ్రిని కోల్పోతాడు. అత‌ని చిన్నప్పుడే త‌ల్లి కూడా చ‌నిపోతుంది. త‌న త‌మ్ముడు మ‌ణిని కూడా అత‌డే పెంచి పెద్ద చేస్తాడు. త‌న తండ్రిని చంపిన పులిని త‌న బావ సాయంతో మ‌ట్టుబెడ‌తాడు. అప్పటి నుంచి పులిని వేటాడ‌టంలో ఆరితేరుతాడు. అనాథ అయిన అమ్మాయి మైనా (క‌మ‌లిని ముఖ‌ర్జీ)ని పెళ్లాడుతాడు. వాళ్ల‌కి చిన్ని అనే పాప కూడా ఉంటుంది. అనుకోకుండా పాత విరోధం ఉన్న ఫారెస్ట్ రేంజ్ ఆఫీసర్ (కిశోర్‌)తో కుమార్‌కి గొడ‌వ‌లు మ‌ర‌లా తిర‌గ‌బెడుతాయి. దాంతో ఫారెస్ట్ ఆఫీస‌ర్ నుంచి అత‌నికి ఇబ్బందులు మొద‌ల‌వుతాయి.
స‌రిగా అదే స‌మ‌యంలో మ‌ణి స్నేహితులు ఇద్ద‌రు క‌లిసి కుమార్ కుటుంబాన్ని సిటీకి తీసుకెళ్తారు. అక్క‌డ డాడీ గిరిజ (జ‌గ‌ప‌తిబాబు) ద‌గ్గ‌ర ప‌ని ఇప్పిస్తారు. సెకండాఫ్‌లో డాడీ గిరిజ పులియూర్‌లో కుమార్ కోసం తిరుగుతుంటాడు. కుమార్ ని చంపాల‌ని ప్రయ‌త్నం చేస్తాడు. డాడీ గిరిజ‌కు, కుమార్‌కు అంత వైరం ఎందుకు వ‌చ్చింది? మ‌ణి ప‌రిస్థితి ఏంటి? డాడీ గిరిజ అస‌లు ఎవ‌రు? మ‌ధ్యలో జూలీ (న‌మిత‌)కి కుమార్‌తో ఉన్న సంబంధం ఏంటి? వ‌ంటివ‌న్నీ ఆస‌క్తిక‌రం.
ప్లస్ పాయింట్లు
సినిమాలో ప్లస్ పాయింట్లు చాలానే ఉన్నాయి. మ‌న్యం పులి అనే టైటిల్‌కు త‌గ్గట్టు ఈ సినిమా స్క్రీన్ మొత్తాన్ని ఆక్రమించేసింది మోహ‌న్‌లాల్ న‌ట‌న‌. అతి త‌క్కువ మేక‌ప్‌తో అడ‌వుల్లో పెరిగిన అమ్మాయిలాగా చ‌క్కగా న‌టించింది క‌మ‌లిని. ఎస్టేట్ ఓన‌ర్ కూతురిగా, స్థానిక యువ‌కుడిపై క‌న్నేసిన పాత్రలో గ్లామ‌ర‌స్‌గా క‌నిపించే ప్రయ‌త్నం చేసింది న‌మిత‌. ఫారెస్ట్ రేంజ్ ఆఫీస‌ర్ గా కిశోర్ న‌ట‌న‌, డాడీ గిరిజ పాత్ర‌లో జ‌గ‌ప‌తిబాబు చాలా బాగా మెప్పించారు. ఖాద‌ర్‌గా, మేస్త్రీగా, కుమార్ బావ‌గా చేసిన న‌టుల పెర్ఫార్మెన్స్ కూడా మెప్పిస్తుంది.
తెర‌మీద పులి కనిపించ‌గానే వ‌చ్చే స‌న్నివేశాలు చాలా బావుంటాయి. ఒళ్లు గ‌గుర్పొడుస్తుంది. గోపీసుంద‌ర్ సంగీతంలో పాట‌లు బావున్నాయి. నేప‌థ్య సంగీతం కూడా చాలా బావుంది. లొకేష‌న్లు ప‌చ్చపచ్చగా క‌ళ్లకు ఆహ్లాద‌క‌రంగా ఉన్నాయి. పీట‌ర్ హెయిన్స్ కంపోజ్ చేసిన ఫైట్లు సినిమాకు ప్రత్యేక ఆక‌ర్షణ‌. చిన్న పిల్ల‌ల‌కు పులి ఎపిసోడ్స్ త‌ప్పకుండా నచ్చి తీరుతాయి. పులితో ఫైట్ చేసే స‌మ‌యంలో మోహన్‌లాల్ ఫేస్ ఎక్స్ ప్రెష‌న్స్, అతను ప‌న్నే వ్యూహాలు బిగ్ స్క్రీన్ మీద బావున్నాయి.
మైన‌స్ పాయింట్లు
అడ‌విలో చిన్న గుడారంలో క‌థ‌లు తెలుగు ప్రేక్షకుల‌కు కొత్త కాదు. క‌థ‌నం కూడా గొప్పగా ఏమీ లేదు. సినిమాలో కామెడీ పెద్దగా లేదు. న‌మిత పాత్రను చూసి క‌మ‌లిని ముఖ‌ర్జీ ఉడుక్కునే స‌న్నివేశాలు పెద్దగా మెప్పించ‌వు. ఆడ‌వాళ్లు స్నానం చేస్తుంటే చూసే వీక్‌నెస్ ఉన్న క‌మెడియ‌న్ పాత్ర ఎబ్బెట్టుగా ఉంటుంది. హీరో త‌మ్ముడి పాత్రను ఇంకాస్త మెరుగ్గా మ‌ల‌చి ఉంటే బావుండేదేమో. నిడివి బాగా ఎక్కువైన‌ట్టు అనిపిస్తుంది.
స‌మ‌ర్పణః తోమిచ‌న్ ముల్క‌పాదమ్‌
రేటింగ్‌: 3/5
నిర్మాణ సంస్థః శ్రీ స‌ర‌స్వ‌తి ఫిలింస్‌
తారాగ‌ణం: మోహ‌న్‌లాల్‌, క‌మ‌లినీ ముఖ‌ర్జీ, జ‌గ‌ప‌తిబాబు, లాల్‌, విను మోహ‌న్ బాల త‌దితరులు
క‌థః ఉద‌య‌కృష్ణ‌
సంగీతం: గోపీసుంద‌ర్‌
చాయా గ్రహ‌ణం: షాజీ కుమార్‌
కూర్పుః జాన్ కుట్టి, షిజాస్ పి.యూన‌స్‌
నిర్మాతః సింధూర‌పువ్వు కృష్ణారెడ్డి
ద‌ర్శక‌త్వం: వైశాక్‌
Videos

Leave a Reply

Your email address will not be published.