పాక్ నుంచి వెల్లువలా నకిలీ నోట్ల ప్రవాహం?

పెద్ద నోట్ల రద్దుతో ఖంగుతిన్న పాకిస్థాన్ నకిలీ నోట్ల ముఠాలు ఇప్పుడు వంద నోట్ల రూపంలో భారత ఆర్థిక వ్యవస్థను దెబ్బకొట్టేందుకు ప్రయత్నిస్తున్నాయి. నకిలీ వంద రూపాయల నోట్లను భారత మార్కెట్లోకి వెదజల్లేందుకు నకిలీ నోట్ల మాఫియా ప్రయత్నాలు ప్రారంభించింది. పంజాబ్, నేపాల్, బంగ్లాదేశ్ గుండా ఈ దొంగ నోట్లను మన దేశంలోకి పంపే అవకాశం ఉందని నిఘా వర్గాలు వెల్లడించాయి. ఈ మార్గాల ద్వారా నకిలీ రూ.500, రూ.1000 నోట్లను పంపి పబ్బం గడుపుకొనే పాక్ దొంగ నోట్ల ముఠా.. కరెన్సీ రద్దుతో కుదేలైంది. కానీ రానున్న రోజుల్లో భారీగా నకిలీ వంద నోట్లను పాక్ సిండికేట్లు భారత మార్కెట్లోకి పంపిణీ చేసే అవకాశం ఉందని తెలుస్తోంది.

నగదు రద్దు వల్ల వారి వద్ద ఉన్న నకిలీ రూ.500, రూ.1000 నోట్ల ముద్రణ పరికరాలు మూలనబడ్డాయి. కానీ వారి వద్ద నకిలీ వంద నోట్లను ముద్రించే యంత్ర సామాగ్రి కూడా ఉంది. తక్కువ విలువైన ఈ కరెన్సీని భారీ మొత్తంలో ముద్రించడం ద్వారా భారత ఆర్థిక వ్యవస్థను చిన్నాభిన్నం చేయడానికి పాక్ సిండికెట్లు తీవ్రంగా శ్రమించే అవకాశం ఉందని నేషనల్ ఇన్వెస్టిగేషన్ ఏజెన్సీ అధికారులు తెలిపారు.

భారత్‌లో ఉన్న నకిలీ రూ. 500, రూ. 1000, రూ. 100 నోట్లు ప్రధానంగా పాక్‌లో తయారైనవే. పాత నోట్లను రద్దు చేయడంతో వంద నోట్లకు డిమాండ్ ఏర్పడింది. దీన్ని పాక్ ముఠాలు క్యాష్ చేసుకునేందుకు ప్రయత్నిస్తున్నాయని ఎన్ఐఏ తెలిపింది. ఒకవేళ ఇదే నిజమైతే, నగదు రద్దు కంటే దీని ప్రభావమే ఎక్కువగా ఉండనుందని నిఘా వర్గాలు భయపడుతున్నాయి. భారత మార్కెట్లో చలామణిలో ఉన్న నగదులో వంద నోట్ల వాటా 17.5 శాతమని ఆర్‌బీఐ గత ఆగష్టులో తెలిపింది.

Videos

Leave a Reply

Your email address will not be published. Required fields are marked *